話說七月初嘅時間，老公同我提及話想搭「水上的士」遊下船海，我同小小豬都想試下搭船睇下夜景，咁就開始留意。但原來依家都只係逢星期六夜晚得一班船，所以啲船飛都真係幾難訂，終於又係經我日日昅到佢個網站實一實，就可以快手成功上網訂到，仲同埋魚子醬一家齊齊嚟玩添。
我地訂嘅係全程船票，所以就由紅磡途經尖沙咀同埋中環之後再以相同路線折返回紅磡碼頭，全程大約70分鐘左右。
「水上的士」分為兩層嘅，上層嘅客位就真係話咁快就滿晒，但其實我又覺得坐下層其實分別不大，坐位都幾舒服嘅，而且當船開啟之後，我地都係走出甲板睇風景，其實望個景觀都係一樣..哈哈！
航線其實都係經由維多利亞港，所以都好清楚見到好多景點，好似中環摩天輪、會展、IFC、K11 Musea、尖沙咀海濱…..，老土啲都要講句：香港夜景都真係好靚。當然…我地另一個重點就係海中央睇『幻彩詠香江』，係船上係可以睇晒兩岸嘅燈光效果，但就好似欠缺左啲音樂，感覺就好似差左啲啲咁，不過第一次睇係有少少驚喜。
雖然今次真係好有遊客Feel，但其實整體感覺都係幾正嘅，而且一程船都係$48(小童有半價)，所以都算係抵玩嘅。
有興趣朋友仔可以去官方網站望望，我嗰次都係夜晚12:00上網睇到有放位，所以即刻預約呀 ~> www.hongkongwatertaxi.com.hk
Search